മതംമാറ്റം അവസാനിപ്പിച്ചില്ലെങ്കിൽ ക്രിസ്ത്യാനികളെ ഒഴിപ്പിക്കും: ശ്രീരാമസേന നേതാവ് പ്രമോദ് മുത്തലിക്

വിജയപുര : മതംമാറ്റം അവസാനിപ്പിച്ചില്ലെങ്കിൽ തങ്ങൾ ക്രിസ്ത്യാനികളെ പുറത്താക്കുമെന്ന ഭീഷണിയുമായി ശ്രീരാമസേന നേതാവ് പ്രമോദ് മുത്തലിക്. ലംബാണി കോളനി നിവാസികളെ ക്രിസ്ത്യാനികളാക്കി മതപരിവർത്തനം നടത്തുന്നവരെ തൻ്റെ സംഘടനയുടെ പ്രവർത്തകർ തുരത്തുമെന്ന് ശ്രീരാമസേന അധ്യക്ഷൻ പ്രമോദ് മുത്തലിക് വിജയപുരയിൽ മാധ്യമങ്ങളോട് സംസാരിക്കവെ പറഞ്ഞു. ‘ഏത് തരത്തിലുള്ള ഭജനയും പ്രാർത്ഥനയും പള്ളിക്കകത്തായിരിക്കണം. ഇത്തരം മതപരിവർത്തനത്തെ സർക്കാർ അടിച്ചമർത്തണം. മതപരിവർത്തന നിരോധന നിയമം ഇപ്പോഴും നിലവിലുണ്ട്, അത് പാലിക്കണം,’ മുത്തലിക് പറഞ്ഞു. കർണാടകയിൽ 3,600 ലംബാനി കോളനികളുണ്ട്, 50 ശതമാനം കോളനികളിലും ക്രിസ്ത്യാനികൾ പ്രവേശിച്ച് മതപരിവർത്തന ശ്രമങ്ങളിൽ ഏർപ്പെട്ടിരിക്കുന്നു. ഈ ശ്രമം അവസാനിപ്പിച്ചില്ലെങ്കിൽ ശ്രീരാമസേന സംഘടന പ്രത്യേക സേന രൂപീകരിച്ച് അവരെ പുറത്താക്കും. സംസ്ഥാനത്ത് മൂവായിരത്തിലധികം ‘അനൗദ്യോഗിക’ പള്ളികളുണ്ടെന്നും സർക്കാർ നടപടിയെടുത്തില്ലെങ്കിൽ സേന ഒഴിപ്പിക്കുമെന്നും മുത്തലിക് കൊപ്പലിൽ പറഞ്ഞു.