ജനങ്ങളുടെ സുരക്ഷ സർക്കാരുകളുടെ ഉത്തരവാദിത്വം: കോട്ടയം അതിരൂപത വൈദികസമിതി

കോട്ടയം : മലയോര മേഖലയിൽ അധിവസിക്കുന്ന ജനങ്ങളുടെ ജീവനും സ്വത്തിനും സംരക്ഷണം ലഭിക്കേണ്ടത് അവരുടെ അവകാശമാണ്. അവർക്ക് ആവശ്യമായ സംരക്ഷണം നൽകുകയെന്നത് കേന്ദ്ര- സംസ്ഥാന സർക്കാരുകളുടെ സുപ്രധാന ഉത്തരവാദിത്വവുമാണ്. ഇക്കാര്യത്തിൽ തുടർച്ചയായി അധികാരികൾക്ക്, പ്രത്യേകിച്ച് വനംവകുപ്പിന് അടുത്തകാലത്ത് സംഭവിച്ചുകൊണ്ടിരിക്കുന്ന വലിയ വീഴ്ചകൾ അത്യന്തം ദുഃഖകരമാണ്. നഷ്ടപരിഹാരമെന്നതുപോലെ പണം നൽകുന്നത് ഒരിക്കലും മനുഷ്യജീവൻ നഷ്ടമാകുന്നതിനു പരിഹാരമാകില്ല. മനുഷ്യജീവൻ നഷ്ടപ്പെടുന്ന സാഹചര്യമുണ്ടാകുമ്പോൾ കുടുംബാംഗങ്ങളും പ്രദേശവാസികളും വൈകാരികമായി പ്രതിഷേധിക്കുന്നത് വന്യമൃഗങ്ങളുടെ ആക്രമണത്താൽ ജീവൻ നഷ്ടപ്പെടുന്നതിനെക്കാൾ ഗുരുതരമായി കാണുന്നത് ഒരിക്കലും അംഗീകരിക്കാനാവില്ല. പ്രശ്നപരിഹാരത്തിന് കേന്ദ്ര-സംസ്ഥാന സർക്കാരുകൾ അടിയന്തിര നടപടികൾ സ്വീകരിച്ചേ മതിയാകൂ.