ബ്രിട്ടീഷ് പള്ളികൾക്ക് 92 മില്യൺ പൗണ്ടിന്റെ പുതിയ സർക്കാർ ഫണ്ട്

യുകെ :പുതിയ ‘പ്ലേസസ് ഓഫ് വർഷിപ്പ് റിന്യൂവൽ ഫണ്ട്’ ചരിത്രപ്രസിദ്ധമായ ദേവാലയങ്ങളെ സംരക്ഷിക്കുന്നതിനായി ബ്രിട്ടീഷ് സർക്കാർ 9.2 കോടി പൗണ്ടിൻ്റെ പുതിയ ഫണ്ട് പ്രഖ്യാപിച്ചു. 2001 മുതൽ നിലവിലുണ്ടായിരുന്ന ‘ലിസ്റ്റഡ് പ്ലേസസ് ഓഫ് വർഷിപ്പ് ഗ്രാൻ്റ് സ്കീമിന്’ പകരമായാണ് ഈ പദ്ധതി വരുന്നത്. പുതിയ ഫണ്ട് വരുന്നതോടെ രാജ്യത്തെ ദേവാലയങ്ങളെ മറ്റ് ദേശീയ സ്മാരകങ്ങൾക്കും ചരിത്രപ്രസിദ്ധമായ കെട്ടിടങ്ങൾക്കും തുല്യമായ പരിഗണനയോടെ സംരക്ഷിക്കാനാണ് സർക്കാർ ലക്ഷ്യമിടുന്നത്. ഇതിലൂടെ 1,000-ത്തോളം സാംസ്കാരിക കേന്ദ്രങ്ങൾക്കും പള്ളികൾക്കും സാമ്പത്തിക സഹായം ഉറപ്പാക്കാൻ സാധിക്കും.

നികുതി ഇളവുകൾ അവസാനിക്കുന്നത് മൂലമുള്ള ആശങ്ക പുതിയ പദ്ധതി നിലവിൽ വരുന്നതോടെ കഴിഞ്ഞ 20 വർഷമായി ദേവാലയങ്ങൾക്ക് ലഭിച്ചിരുന്ന വാറ്റ് നികുതി ഇളവുകൾ അവസാനിക്കുകയാണ്. പഴയ നിയമപ്രകാരം പള്ളികളുടെ അറ്റകുറ്റപ്പണികൾക്ക് നൽകേണ്ടി വരുന്ന നികുതി പണം സർക്കാരിൽ നിന്ന് തിരികെ ലഭിക്കുമായിരുന്നു. എന്നാൽ പുതിയ സംവിധാനത്തിൽ പള്ളികൾ തങ്ങളുടെ പണികളിൽ 20 ശതമാനം വാറ്റ് നികുതി നേരിട്ട് നൽകേണ്ടി വരും. സർക്കാർ പുതിയ ഫണ്ട് അനുവദിച്ചിട്ടുണ്ടെങ്കിലും ഈ നികുതി ബാധ്യത പ്രാദേശിക സഭകൾക്ക് വലിയ സാമ്പത്തിക വെല്ലുവിളിയാകുമെന്ന് വിദഗ്ധർ ചൂണ്ടിക്കാട്ടുന്നു.

സഭാ സംഘടനകളുടെ പ്രതികരണം സർക്കാരിൻ്റെ പുതിയ സാമ്പത്തിക സഹായത്തെ സ്വാഗതം ചെയ്യുമ്പോഴും നികുതി ഇളവ് നീക്കം ചെയ്തതിൽ സഭാ സംഘടനകൾ ആശങ്കയിലാണ്. സന്നദ്ധപ്രവർത്തകരെയും സംഭാവനകളെയും ആശ്രയിച്ചു കഴിയുന്ന പള്ളികൾക്ക് ഇത്രയും വലിയ നികുതി തുക കണ്ടെത്തുക പ്രയാസകരമായിരിക്കുമെന്ന് നാഷണൽ ചർച്ചസ് ട്രസ്റ്റ് ചെയർമാൻ സർ ഫിലിപ്പ് റുട്ട്നാം മുന്നറിയിപ്പ് നൽകി. മ്യൂസിയങ്ങൾക്കും ഗാലറികൾക്കും നൽകുന്ന നികുതി ഇളവുകൾ പള്ളികൾക്കും ലഭ്യമാക്കണമെന്നും, പുതിയ ഫണ്ട് ലഭിക്കുന്നതിനുള്ള നടപടിക്രമങ്ങൾ ലളിതമാക്കണമെന്നും സഭാ പ്രതിനിധികൾ ആവശ്യപ്പെട്ടു.