കുട്ടികളിലെ ലിംഗമാറ്റ ശസ്ത്രക്രിയ ക്രിമിനൽ കുറ്റം; അമേരിക്കയിൽ പുതിയ ബിൽ പാസായി

വാഷിംഗ്ടൺ : പ്രായപൂർത്തിയാകാത്ത കുട്ടികളിൽ ലിംഗമാറ്റ ശസ്ത്രക്രിയകളും ഹോർമോൺ ചികിത്സകളും നടത്തുന്നത് ക്രിമിനൽ കുറ്റമാക്കുന്ന നിർണ്ണായകമായ പ്രൊട്ടക്ട് ചിൽഡ്രൻസ് ഇന്നസെൻസ് ആക്ട് അമേരിക്കൻ ജനപ്രതിനിധി സഭ പാസാക്കി. ഏറെ നീണ്ടുനിന്ന ചർച്ചകൾക്കൊടുവിൽ 211-നെതിരെ 216 വോട്ടുകൾക്കാണ് ബിൽ സഭയിൽ വിജയിച്ചത്.

കുട്ടികളുടെ ശാരീരികവും മാനസികവുമായ സുരക്ഷിതത്വം ഉറപ്പാക്കുക എന്ന ലക്ഷ്യത്തോടെയാണ് ഈ നിയമനിർമ്മാണം കൊണ്ടുവന്നതെന്ന് ബിൽ അവതരിപ്പിച്ചവർ വ്യക്തമാക്കി. പുതിയ നിയമപ്രകാരം പ്രായപൂർത്തിയാകാത്തവർക്ക് ലിംഗമാറ്റത്തിനായി ശസ്ത്രക്രിയകൾ നടത്തുന്നവർക്കോ അതിന് പ്രേരിപ്പിക്കുന്നവർക്കോ 10 വർഷം വരെ തടവോ കനത്ത പിഴയോ ശിക്ഷയായി ലഭിക്കാം. ചില സാഹചര്യങ്ങളിൽ തടവും പിഴയും ഒരുമിച്ച് അനുഭവിക്കേണ്ടി വരും.