*ലണ്ടനിലെ വെസ്‌ലി ഹോട്ടൽ വികസനത്തിന് മെത്തഡിസ്റ്റ് ചർച്ചിന്റെ 1.2 ദശലക്ഷം പൗണ്ട് നിക്ഷേപം*

യുകെ : ലണ്ടനിലെ പ്രശസ്തമായ വെസ്‌ലി ഹോട്ടലിന്റെ വികസനത്തിനായി മെത്തഡിസ്റ്റ് ചർച്ച് 1.2 ദശലക്ഷം പൗണ്ടിന്റെ (ഏകദേശം 12 കോടിയിലധികം രൂപ) നിക്ഷേപ പാക്കേജിന് അംഗീകാരം നൽകി. യൂസ്റ്റണിലെ ഹോട്ടലിന്റെ പ്രവർത്തനങ്ങൾ വിപുലീകരിക്കുന്നതിനും ആധുനികവൽക്കരിക്കുന്നതിനുമാണ് ഈ തുക പ്രധാനമായും വിനിയോഗിക്കുന്നത്. സഭയുടെ ദീർഘകാല സുസ്ഥിരതയും സാമൂഹിക പ്രതിബദ്ധതയുള്ള പ്രവർത്തനങ്ങളും ലക്ഷ്യമിട്ടാണ് ഈ സുപ്രധാന നീക്കം.

“ധാർമ്മിക ആതിഥ്യമര്യാദ” എന്ന ആശയത്തിലൂന്നിയാണ് യൂസ്റ്റണിലെയും കാംഡൻ ടൗണിലെയും ഹോട്ടലുകൾ പ്രവർത്തിക്കുന്നത്. ഈ ഹോട്ടലുകളിൽ നിന്നുള്ള ലാഭം പൂർണ്ണമായും സഭയുടെ ജീവകാരുണ്യ-മിഷൻ പ്രവർത്തനങ്ങൾക്കാണ് ഉപയോഗിക്കുന്നത്. യൂസ്റ്റൺ സൈറ്റിലെ പുതിയ മാറ്റങ്ങൾ വഴി സംരംഭത്തിന്റെ സ്വാധീനം വർദ്ധിപ്പിക്കാനും കൂടുതൽ വരുമാനം സമാഹരിക്കാനും സാധിക്കുമെന്ന് ചർച്ച് അധികൃതർ പ്രത്യാശ പ്രകടിപ്പിച്ചു.