വിഴിഞ്ഞം സമരത്തെ ക്രൈസ്തവ സമരമെന്ന് മുദ്രകുത്തുന്നത് കേരള സംസ്‌കാരത്തിന് യോജിച്ചതല്ല : ജോസഫ് പാംപ്ലാനി
തിരുവനന്തപുരം : വിഴിഞ്ഞത്ത് മത്സ്യത്തൊഴിലാളികൾ നടത്തി വരുന്ന സമരത്തെ ക്രൈസ്തവ സമരം എന്നും സഭാ സമരം എന്നും മുദ്രകുത്തുന്നത് കേരളത്തിന്റെ സംസ്‌കാരത്തിന് യോജിച്ചതല്ലെന്ന് തലശ്ശേരി ആര്‍ച്ച് ബിഷപ്പ് മാര്‍ ജോസഫ് പാംപ്ലാനി.
സമരക്കാരെ അധികാരികള്‍ രാജ്യദ്രോഹികളായി ചൂണ്ടിക്കാണിക്കുന്നത് യഥാര്‍ത്ഥ പ്രശ്‌നം മറച്ചുവെക്കാനാണ്. സമരക്കാരുടെ ആവശ്യം തികച്ചും ന്യായം ആണ്. പുനരധിവാസ പാക്കേജ് സര്‍ക്കാര്‍ ഇത്ര നാളായിട്ടും നടപ്പാക്കിയിട്ടില്ല . പോര്‍ട്ട് ഒഴിവാക്കുക എന്നത് ഈ സാഹചര്യത്തില്‍ പ്രായോഗികമാണെന്ന് കരുതുന്നില്ലെന്നും മാര്‍ ജോസഫ് പാംപ്ലാനി വ്യെക്തമാക്കി .
രാജ്യ വിരുദ്ധമായ ലക്ഷ്യം ആര്‍ക്കെങ്കിലുമുണ്ടെങ്കില്‍ സര്‍ക്കാര്‍ തന്നെ അക്കാര്യം ശരിയായി അന്വേഷിക്കുകയാണ് വേണ്ടതെന്നും മാര്‍ ജോസഫ് പാംപ്ലാനി പറഞ്ഞു. പുനരധിവാസ പാക്കേജ് നടപ്പാക്കാതെ തുറമുഖം തുറന്നാല്‍ ഒരു കാലത്തും പുനരധിവാസം നടക്കില്ല. ജനകീയ സമരത്തെ ലത്തീന്‍ സഭയുടെ സമരം ക്രിസ്ത്യാനികളുടെ സമരം എന്നൊക്കെ ബ്രാന്റ് ചെയ്യുന്നത് കേരളത്തിന് ചേര്‍ന്നതല്ലെന്നും മാര്‍ ജോസഫ് പാംപ്ലാനി പറഞ്ഞു.
