വ്യാജ പ്രവചനങ്ങൾ; ടെലിവാഞ്ചലിസ്റ്റുകളുടെ സാമ്പത്തിക തട്ടിപ്പുകൾ പുറത്ത്

ഡാലസ്: സുവിശേഷ പ്രസംഗത്തിന്റെ മറവിൽ ധനികരായ വ്യക്തികളെ ലക്ഷ്യം വെച്ച് വ്യാജ പ്രവചനങ്ങൾ നടത്തി കോടിക്കണക്കിന് രൂപ തട്ടിയെടുക്കുന്ന സംഘങ്ങളെക്കുറിച്ച് ട്രിനിറ്റി ഫൗണ്ടേഷന്റെ ഞെട്ടിക്കുന്ന റിപ്പോർട്ട്. ബിസിനസ്സിലും മറ്റും വലിയ സാമ്പത്തിക വളർച്ചയുള്ള വ്യക്തികളെ പ്രമുഖ ‘പ്രവാചകന്മാർ’ വ്യക്തിപരമായി സമീപിക്കുകയും അവർക്ക് അനുകൂലമായ ദൈവിക വെളിപ്പെടുത്തലുകൾ ഉണ്ടെന്ന് വിശ്വസിപ്പിക്കുകയും ചെയ്യുന്ന രീതിയെക്കുറിച്ചാണ് വെളിപ്പെടുത്തൽ ഉണ്ടായിരിക്കുന്നത്. ബൈബിൾ അധ്യാപകനായ മൈക്ക് വിംഗർ ഉൾപ്പെടെയുള്ളവർ ഇത്തരം തട്ടിപ്പുകൾക്കെതിരെ രംഗത്തുവന്നിട്ടുണ്ട്.

പ്രമുഖ ടെലിവാഞ്ചലിസ്റ്റ് ബെന്നി ഹിൻ ഉൾപ്പെടെയുള്ളവർ ഇത്തരം പ്രവർത്തനങ്ങളിൽ ഏർപ്പെടുന്നതായി റിപ്പോർട്ട് ചൂണ്ടിക്കാണിക്കുന്നു. ദൈവകല്പന പ്രകാരം ദശലക്ഷക്കണക്കിന് ഡോളർ സംഭാവന നൽകിയാൽ ബിസിനസ്സിലെ തകർച്ചകൾ മാറുമെന്നും സമ്പത്ത് വർദ്ധിക്കുമെന്നും ഇവർ വിശ്വസിപ്പിക്കുന്നു. എന്നാൽ ഇത്തരം പ്രവചനങ്ങൾ പലപ്പോഴും മുൻകൂട്ടി പ്ലാൻ ചെയ്തതാണെന്നും മതവിശ്വാസികളെ സാമ്പത്തികമായി ചൂഷണം ചെയ്യാനാണ് ഇവ ഉപയോഗിക്കുന്നതെന്നും ട്രിനിറ്റി ഫൗണ്ടേഷൻ മുന്നറിയിപ്പ് നൽകുന്നു. മതപരമായ സുതാര്യത ഉറപ്പാക്കണമെന്നും ഇത്തരം തട്ടിപ്പുകൾക്കെതിരെ വിശ്വാസികൾ ജാഗ്രത പാലിക്കണമെന്നും റിപ്പോർട്ടിൽ പറയുന്നു.