ന്യൂകാസിൽ സർവ്വകലാശാലയിൽ അധ്യാപകരുടെ വിശ്വാസ പ്രഖ്യാപനം*

യുഎസ് : ന്യൂകാസിൽ സർവ്വകലാശാലയിലെ മുപ്പതോളം വരുന്ന ക്രിസ്ത്യൻ അധ്യാപകരും ജീവനക്കാരും ചേർന്ന് സർവ്വകലാശാലയിലെ വിദ്യാർത്ഥി പത്രത്തിലൂടെ തങ്ങളുടെ ക്രിസ്തീയ വിശ്വാസം പരസ്യമായി പ്രഖ്യാപിച്ചു. യേശുക്രിസ്തുവിലുള്ള തങ്ങളുടെ വിശ്വാസം തുറന്നുപറഞ്ഞ ഇവർ, ക്രിസ്തീയ വിശ്വാസത്തെക്കുറിച്ച് കൂടുതൽ അന്വേഷിക്കാനും പഠിക്കാനും വിദ്യാർത്ഥികളെ പ്രോത്സാഹിപ്പിക്കുകയും ചെയ്യുന്നു. ബുദ്ധിജീവികളും അക്കാദമിക് വിദഗ്ധരും തങ്ങളുടെ വിശ്വാസം ഇത്തരത്തിൽ പരസ്യമായി വെളിപ്പെടുത്തിയത് സർവ്വകലാശാലാ ക്യാമ്പസിൽ വലിയ ചർച്ചകൾക്ക് വഴിയൊരുക്കിയിരിക്കുകയാണ്.

ഈ നീക്കത്തിന് പിന്നിൽ അടുത്തിടെ രൂപീകരിക്കപ്പെട്ട ‘ന്യൂകാസിൽ യൂണിവേഴ്സിറ്റി ക്രിസ്റ്റ്യൻ നെറ്റ്‌വർക്ക്’ (Newcastle University Christian Network) എന്ന കൂട്ടായ്മയാണ്. സർവ്വകലാശാലയുടെ ഇക്വിറ്റി, ഡൈവേഴ്‌സിറ്റി ആൻഡ് ഇൻക്ലൂഷൻ (EDI) വിഭാഗത്തിന് കീഴിലുള്ള ഒരു അംഗീകൃത സ്റ്റാഫ് നെറ്റ്‌വർക്കായാണ് ഇതിനെ സ്വാഗതം ചെയ്തിരിക്കുന്നത്. വിവിധ വിഷയങ്ങളിൽ പഠനം നടത്തുന്ന പ്രൊഫസർമാർ ഉൾപ്പെടെയുള്ളവർ ഈ കത്തിൽ ഒപ്പുവെച്ചിട്ടുണ്ട് എന്നത് ശ്രദ്ധേയമാണ്. ശാസ്ത്രവും അക്കാദമിക് പഠനങ്ങളും ക്രിസ്തീയ വിശ്വാസത്തിന് വിരുദ്ധമല്ലെന്ന് സമൂഹത്തെ ബോധ്യപ്പെടുത്താൻ കൂടിയാണ് ഇവർ ശ്രമിക്കുന്നത്.

ന്യൂകാസിൽ സർവ്വകലാശാലയിലെ ജിയോഗ്രഫി, പൊളിറ്റിക്സ് ആൻഡ് സോഷ്യോളജി വിഭാഗം പ്രൊഫസറായ നിക്ക് മെഗോറാൻ (Nick Megoran) ഈ ഉദ്യമത്തെക്കുറിച്ച് തന്റെ കാഴ്ചപ്പാടുകൾ പങ്കുവെച്ചു. താൻ വർഷങ്ങളായി ഒരു ക്രിസ്ത്യാനിയാണെന്നും എന്നാൽ പലപ്പോഴും വിദ്യാർത്ഥികൾ തങ്ങളെപ്പോലുള്ളവർക്ക് വിശ്വാസമുണ്ടെന്ന കാര്യം അറിയുന്നില്ലെന്നും അദ്ദേഹം പറഞ്ഞു. കൗമാരക്കാരും യുവാക്കളും മാനസികമായ വെല്ലുവിളികൾ നേരിടുന്ന ഈ കാലഘട്ടത്തിൽ, ക്രിസ്തീയ വിശ്വാസം നൽകുന്ന പ്രത്യാശയും സമാധാനവും അവർക്ക് പരിചയപ്പെടുത്തി കൊടുക്കുക എന്നതാണ് തങ്ങളുടെ ലക്ഷ്യമെന്നും അദ്ദേഹം കൂട്ടിച്ചേർത്തു.