*സമാധാനത്തിന്റെ ഇടങ്ങളാകാൻ സഭകൾ; ‘പിൽഗ്രിം പ്ലേസ്’ പദ്ധതിക്ക് തുടക്കം*

യുകെ : വിശ്വാസികൾക്കും സഞ്ചാരികൾക്കും ശാന്തമായി പ്രാർത്ഥിക്കാനും ചിന്തിക്കാനുമുള്ള ഒരിടമൊരുക്കാൻ സഭകൾ ‘പിൽഗ്രിം പ്ലേസ്’ ആയി രജിസ്റ്റർ ചെയ്യണമെന്ന് ആഹ്വാനം. ‘ഫെയ്ത്ത് ഇൻ ദ നോർത്ത്’ എന്ന കൂട്ടായ്മയുടെ ഭാഗമായാണ് ഈ പുതിയ നീക്കം. മേജർ ചർച്ചസ് നെറ്റ്‌വർക്കിൽ’ നിന്നുള്ള 22 സഭാ നേതാക്കൾ പങ്കെടുത്ത യോഗത്തിലാണ് ‘ഫെയ്ത്ത് ഇൻ ദ നോർത്ത്’ എന്ന സംരംഭത്തിന് കീഴിൽ സഭകളെ തീർത്ഥാടന കേന്ദ്രങ്ങളായി മാറ്റാൻ തീരുമാനമായത്. തിരക്കേറിയ ജീവിതത്തിനിടയിൽ അല്പനേരം ശാന്തമായിരിക്കാനും പ്രാർത്ഥിക്കാനും ആഗ്രഹിക്കുന്നവർക്കായി സഭകളുടെ വാതിലുകൾ തുറന്നുകൊടുക്കുക എന്നതാണ് ഇതിന്റെ ലക്ഷ്യം. വിശ്വാസികൾക്കും അല്ലാത്തവർക്കും ഒരുപോലെ പ്രയോജനപ്പെടുന്ന രീതിയിൽ, ആത്മീയമായ ചിന്തകൾക്കും അർത്ഥവത്തായ അന്വേഷണങ്ങൾക്കും അനുയോജ്യമായ ഒരിടം ഒരുക്കാൻ ഈ പദ്ധതിയിലൂടെ സഭകളെ പ്രോത്സാഹിപ്പിക്കുന്നു.

സമീപകാലത്തായി തീർത്ഥാടനങ്ങളോടുള്ള താൽപ്പര്യം ജനങ്ങൾക്കിടയിൽ വർദ്ധിച്ചുവരുന്നതായി സഭാ നേതാക്കൾ നിരീക്ഷിക്കുന്നു. ജീവിതത്തിന്റെ ഗതിയെക്കുറിച്ചും വിശ്വാസത്തെക്കുറിച്ചും ആഴത്തിൽ ചിന്തിക്കാൻ ആഗ്രഹിക്കുന്നവർ പ്രത്യേകമായ ഇടങ്ങൾ തേടി യാത്ര ചെയ്യാറുണ്ട്. അത്തരം സഞ്ചാരികൾക്ക് സമാധാനത്തോടെ ഇരിക്കാനും പ്രാർത്ഥിക്കാനും പ്രതീക്ഷ കണ്ടെത്താനും ഈ ‘പിൽഗ്രിം പ്ലേസുകൾ’ വലിയ സഹായമാകും. സഭകളെ കേവലം ആരാധനാലയങ്ങൾ എന്നതിലുപരി, ആത്മീയ യാത്രയിലെ ഒരു വിശ്രമകേന്ദ്രമായി മാറ്റാനാണ് ഈ പദ്ധതിയിലൂടെ ലക്ഷ്യമിടുന്നത്.