പുരോഹിതരുടെ ക്ഷേമത്തിനായി ചർച്ച് ഓഫ് ഇംഗ്ലണ്ട് 6 ലക്ഷം പൗണ്ട് അനുവദിച്ചു

യുകെ :പുരോഹിതരുടെ ക്ഷേമത്തിനായി പ്രവർത്തിക്കുന്ന ദേശീയ ചാരിറ്റി സംഘടനകൾക്ക് 6,00,000 പൗണ്ട് (ഏകദേശം 6.3 കോടി രൂപ) നൽകാൻ ചർച്ച് ഓഫ് ഇംഗ്ലണ്ടിന്റെ ആർച്ച് ബിഷപ്പ് കൗൺസിൽ തീരുമാനിച്ചു. ഇതിൽ 5,00,000 പൗണ്ടും ലഭിക്കുന്നത് ‘ക്ലെർജി സപ്പോർട്ട് ട്രസ്റ്റിനാണ്’. കഴിഞ്ഞ വർഷം നൽകിയ 2 മില്യൺ പൗണ്ടിന് പുറമെയാണിത്. സഭയിലെ ശുശ്രൂഷകർ നേരിടുന്ന സാമ്പത്തിക സമ്മർദ്ദം കുറയ്ക്കുകയാണ് ഈ വലിയ ഗ്രാന്റിലൂടെ സഭ ലക്ഷ്യമിടുന്നത്.

പുരോഹിതരുടെ നിത്യജീവിതത്തിലെ അത്യാവശ്യ ചെലവുകൾക്കായാണ് ഈ തുക പ്രധാനമായും ഉപയോഗിക്കുന്നത്. ലാപ്ടോപ്പുകൾ വാങ്ങുക, അപ്രതീക്ഷിതമായി വരുന്ന കാർ റിപ്പയറിംഗ് ചെലവുകൾ കണ്ടെത്തുക, കുട്ടികളുടെ സ്കൂൾ യൂണിഫോമിനുള്ള പണം കണ്ടെത്തുക തുടങ്ങിയ ദൈനംദിന കാര്യങ്ങളിൽ ബുദ്ധിമുട്ടുന്ന പുരോഹിതർക്ക് ഇത് വലിയ ആശ്വാസമാകും. ആഗോളതലത്തിൽ വർദ്ധിച്ചുവരുന്ന ജീവിതച്ചെലവ് പുരോഹിതരെയും സാരമായി ബാധിച്ചിട്ടുണ്ടെന്ന തിരിച്ചറിവാണ് ഈ തീരുമാനത്തിന് പിന്നിൽ.

കഴിഞ്ഞ വർഷത്തെ കണക്കനുസരിച്ച്, ചർച്ച് ഓഫ് ഇംഗ്ലണ്ടിൽ സേവനമനുഷ്ഠിക്കുന്ന അഞ്ചിലൊന്ന് പുരോഹിതരും ഈ ട്രസ്റ്റിന്റെ സഹായം തേടിയിട്ടുണ്ട്. ആകെ 7,000-ത്തിലധികം ഗ്രാന്റുകളാണ് കഴിഞ്ഞ വർഷം മാത്രം വിതരണം ചെയ്തത്. സഭയുടെ ഈ ഇടപെടൽ പുരോഹിതരുടെ മാനസികാരോഗ്യം മെച്ചപ്പെടുത്താനും കൂടുതൽ കാര്യക്ഷമമായി ശുശ്രൂഷകളിൽ ശ്രദ്ധ കേന്ദ്രീകരിക്കാനും അവരെ സഹായിക്കുമെന്ന് വിലയിരുത്തപ്പെടുന്നു.