*ലിവർപൂളിൽ നടത്താനിരുന്ന ‘വാക്ക് വിത്ത് ജീസസ്’ മാർച്ചിന് അതിരൂപതയുടെ അനുമതിയില്ല*

ലിവർപൂൾ : ലിവർപൂൾ അതിരൂപതയുടെ പിയാസ പ്രദേശം ‘വാക്ക് വിത്ത് ജീസസ്’ എന്ന മാർച്ചിന്റെ പ്രാരംഭ പോയിന്റായി ഉപയോഗിക്കാൻ അനുമതി നൽകിയിട്ടില്ലെന്ന് സഭാ അധികൃതർ വ്യക്തമാക്കി. തീവ്രവലതുപക്ഷ പാർട്ടിയായ യുകെ ഇൻഡിപെൻഡൻസ് പാർട്ടിയുടെ (UKIP) നേതാവ് നിക്ക് ടെൻകോണിയാണ് നോമ്പുകാലത്ത് ക്രിസ്തുവിനായി നിലകൊള്ളാൻ ആഹ്വാനം ചെയ്തുകൊണ്ട് മാർച്ച് സംഘടിപ്പിക്കുന്നത്. മാർച്ച് 21-ന് ലിവർപൂൾ മെട്രോപൊളിറ്റൻ കത്തീഡ്രലിലെ കത്തീഡ്രൽ ഹൗസ് പടികളിൽ ഒത്തുകൂടാനാണ് സംഘാടകർ നിർദ്ദേശിച്ചിരിക്കുന്നത്.

എന്നാൽ, സംഘാടകർ അതിരൂപതയുമായി ബന്ധപ്പെട്ടിട്ടില്ലെന്നും പള്ളിക്ക് സ്വന്തമായുള്ള സ്ഥലം ഇത്തരമൊരു പരിപാടിക്കായി ഉപയോഗിക്കാൻ അനുവാദം നൽകിയിട്ടില്ലെന്നും സഭ അറിയിച്ചു. പള്ളി പടികളിൽ നിന്ന് മാർച്ച് തുടങ്ങുമെന്ന് സംഘാടകർ പരസ്യം നൽകിയിട്ടുണ്ടെങ്കിലും അനുമതിയില്ലാതെ ഇത്തരം നീക്കങ്ങൾ അനുവദിക്കില്ലെന്ന് അധികൃതർ വ്യക്തമാക്കിയിട്ടുണ്ട്.