*ബിബിസിക്കെതിരെ യോർക്ക് ആർച്ച് ബിഷപ്പ്; മതപരമായ അറിവില്ലായ്മയെന്ന് വിമർശനം*

യുകെ : ബിബിസിയുടെ മതപരമായ പരിപാടികളുടെ നിലവാരതകർച്ചയിൽ യോർക്ക് ആർച്ച് ബിഷപ്പ് സ്റ്റീഫൻ കോട്രെൽ കടുത്ത അതൃപ്തി രേഖപ്പെടുത്തി. കോർപ്പറേഷനിൽ മതപരമായ അറിവില്ലായ്മ നിലനിൽക്കുന്നതായി അദ്ദേഹം കുറ്റപ്പെടുത്തി. ബിബിസിയുടെ ചാർട്ടർ പുതുക്കുന്നതുമായി ബന്ധപ്പെട്ട ചർച്ചയിൽ സംസാരിക്കുകയായിരുന്നു ചർച്ച് ഓഫ് ഇംഗ്ലണ്ടിലെ രണ്ടാമത്തെ മുതിർന്ന ബിഷപ്പായ അദ്ദേഹം.

സമൂഹത്തിലെ ധ്രുവീകരണത്തിനെതിരെയുള്ള ശക്തമായ പ്രതിരോധമാണ് വിശ്വാസമെന്നും എന്നാൽ ബിബിസിയുടെ ഉള്ളടക്കങ്ങളിൽ നിന്ന് വിശ്വാസപരമായ കാര്യങ്ങൾ പാർശ്വവൽക്കരിക്കപ്പെടുകയാണെന്നും അദ്ദേഹം ആശങ്ക പ്രകടിപ്പിച്ചു. സമാധാനപരവും ഐക്യമുള്ളതുമായ ഒരു സമൂഹം കെട്ടിപ്പടുക്കുന്നതിൽ മതപരമായ ചർച്ചകൾക്ക് വലിയ പങ്കുണ്ടെന്ന് അദ്ദേഹം ഓർമ്മിപ്പിച്ചു. മാധ്യമങ്ങൾ മതപരമായ വിഷയങ്ങളിൽ കൂടുതൽ പക്വതയും അറിവും പ്രകടിപ്പിക്കേണ്ടത് അത്യാവശ്യമാണെന്ന് അദ്ദേഹം കൂട്ടിച്ചേർത്തു.