ന്യൂറോ സർജറി ടേബിളിലെ ദൈവസാന്നിധ്യം തുറന്നുപറഞ്ഞ് ബെൻ കാഴ്സൺ

ഡാളസ്: ശാസ്ത്രവും ദൈവവിശ്വാസവും തമ്മിലുള്ള ആഴമേറിയ ബന്ധത്തെക്കുറിച്ച് ചർച്ച ചെയ്യുന്ന എട്ടാമത് വാർഷിക ‘ഡാളസ് കോൺഫറൻസ് ഓൺ സയൻസ് ആൻഡ് ഫെയ്ത്ത്’ സമ്മേളനത്തിൽ ലോകപ്രശസ്ത ന്യൂറോ സർജൻ ഡോ. ബെൻ കാഴ്സൺ മുഖ്യപ്രഭാഷണം നടത്തി. മനുഷ്യന്റെ സമത്വവും അന്തസ്സും ദൈവത്തിൽ അധിഷ്ഠിതമാണെന്ന് അദ്ദേഹം പറഞ്ഞു.

മനുഷ്യർക്കിടയിലുള്ള ബാഹ്യമായ വ്യത്യാസങ്ങൾ വെറും ഉപരിപ്ലവമാണെന്ന് അദ്ദേഹം ചൂണ്ടിക്കാട്ടി. “ലോകത്തിന്റെ ഏത് ഭാഗത്തുള്ള ആളാണെങ്കിലും തലയോട്ടി തുറന്നു പരിശോധിച്ചാൽ തലച്ചോറുകൾ എല്ലാം ഒരുപോലെയാണ്. അതാണ് നിങ്ങൾ ആരാണെന്ന് തീരുമാനിക്കുന്നത്. ആ സത്തയ്ക്കാണ് ദൈവവുമായി സംവദിക്കാൻ കഴിയുന്നത്,” ബെൻ കാഴ്സൺ പറഞ്ഞു. വിഭിന്നമായ അഭിപ്രായമുള്ളവരോട് ആദരവോടെ ഇടപഴകണമെന്നും അദ്ദേഹം ആഹ്വാനം ചെയ്തു.