കോശി കമ്മീഷൻ റിപ്പോർട്ട് : അതൃപ്തിയുമായി ക്രൈസ്തവ സഭകൾ

തൃശൂർ: ക്രൈസ്തവരുടെ പിന്നാക്കാവസ്ഥ സംബന്ധിച്ച കോശി കമ്മിഷൻ റിപ്പോർട്ടിലെ ശുപാർശകൾ പരിശോധിക്കാൻ സമിതിയെ നിയോഗിക്കാനുള്ള സർക്കാർ തീരുമാനത്തിൽ ക്രൈസ്തവ സഭകൾക്കുള്ളിൽ അതൃപ്തി. റിപ്പോർട്ട് സമർപ്പിച്ച് ഒരു വർഷത്തിന് ശേഷമാണ് പുതിയ സമിതിയെ നിയമിക്കുന്നത്. ഇത് ആസൂത്രിതമായ തെരഞ്ഞെടുപ്പാണ് ലക്ഷ്യമിടുന്നതെന്നാണ് സഭകൾക്കുള്ളിലെ വിമർശനം. ചീഫ് സെക്രട്ടറി ഡോ.വി.വേണു ചെയർമാനും പൊതുഭരണ സെക്രട്ടറിയും ന്യൂനപക്ഷ ക്ഷേമ വകുപ്പ് സെക്രട്ടറിയും അടങ്ങുന്നതാണ് സമിതി.

ഓരോ വകുപ്പുമായി ബന്ധപ്പെട്ട ശുപാർശകൾ രണ്ടാഴ്ചയിലൊരിക്കൽ നടത്തണമെന്നും ഓരോ വകുപ്പുമായി ബന്ധപ്പെട്ട നിർദേശങ്ങൾ വകുപ്പ് സെക്രട്ടറിമാരെ പങ്കെടുപ്പിച്ച് പരിശോധിച്ച് അഭിപ്രായങ്ങൾ അറിയിക്കണമെന്നും സർക്കാർ ഉത്തരവിൽ പറയുന്നു. ഫിഷറീസ്, പൊതുവിദ്യാഭ്യാസം, ഉന്നതവിദ്യാഭ്യാസം, ന്യൂനപക്ഷക്ഷേമം എന്നീ വകുപ്പുകൾക്ക് മുൻഗണന നൽകാനും മന്ത്രിസഭാ യോഗത്തിന് പരിഗണിക്കാവുന്ന തരത്തിൽ ആദ്യഘട്ട ശുപാർശകൾ ഒരു മാസത്തിനകം സമർപ്പിക്കാനുമാണ് സമിതിയെ നിയോഗിച്ചിരിക്കുന്നത്. തിരഞ്ഞെടുപ്പ് കഴിയുമെന്നും അതുവരെ സമുദായത്തെ ഒപ്പം നിർത്താമെന്നുമാണ് സർക്കാർ കരുതുന്നതെന്നാണ് സഭകൾക്കുള്ളിൽ ഉയരുന്ന വിമർശനം. കഴിഞ്ഞ വർഷം മേയിൽ ജെ.ബി. കോശി കമ്മീഷൻ റിപ്പോർട്ട് സമർപ്പിച്ചു.

ക്രൈസ്തവ സഭകൾ പലതവണ ആവശ്യപ്പെട്ടിട്ടും റിപ്പോർട്ട് പുറത്തുവിടുകയോ സ്വീകരിച്ച നടപടികൾ വിശദീകരിച്ച് നിയമസഭയിൽ റിപ്പോർട്ട് സമർപ്പിക്കുകയോ ചെയ്തിട്ടില്ല. മന്ത്രിസഭാ യോഗം റിപ്പോർട്ട് പരിഗണിച്ചിട്ടില്ല. റിപ്പോർട്ട് നടപ്പാക്കണമെന്ന ആവശ്യം വ്യാപകമായതിനെ തുടർന്ന് ആശ്വാസമെന്ന നിലയിലാണ് ഇപ്പോൾ സമിതിയെ നിയോഗിച്ചിരിക്കുന്നത്. മുഖ്യമന്ത്രിക്ക് നൽകിയ റിപ്പോർട്ടിൽ അഭിപ്രായം അറിയിക്കാൻ വിവിധ വകുപ്പുകളിലേക്ക് അയച്ചിട്ടുണ്ടെന്നാണ് ഇതുവരെ സർക്കാർ അറിയിച്ചിരുന്നത്