വയനാട്ടിലെ പ്രതിഷേധത്തിൽ ഇടപെട്ട് മുഖ്യമന്ത്രി; ഉന്നതതല യോഗം ചേരാൻ നിർദേശം
വയനാട് : വയനാട്ടിൽ വന്യജീവി ആക്രമണത്തിൽ പ്രതിഷേധം ശക്തമായതോടെ വിഷയത്തിൽ ഇടപെട്ട് മുഖ്യമന്ത്രി പിണറായി വിജയൻ. ജില്ലയിൽ ഉന്നതതല യോഗം ചേരാൻ മുഖ്യമന്ത്രി നിർദേശിച്ചു. വന്യജീവി ആക്രമണവുമായി ബന്ധപ്പെട്ട പ്രശ്‌നങ്ങൾ ചർച്ച ചെയ്യാൻ മന്ത്രിമാരുടെ നേതൃത്വത്തിൽ ഉന്നതതല യോഗം വിളിക്കാനാണ് മുഖ്യമന്ത്രി നിർദേശം നൽകിയത്. ഈ മാസം 20ന് യോഗം ചേരും. റവന്യു, വനം, തദ്ദേശസ്വയംഭരണ വകുപ്പ് മന്ത്രിമാരുടെ നേതൃത്വത്തിലാണ് യോഗം. വയനാട് ജില്ലയിലെ തദ്ദേശ ജനപ്രതിനിധികൾ അടക്കമുള്ള മുഴുവൻ ജനപ്രതിനിധികളും ഉന്നത ഉദ്യോഗസ്ഥരും യോഗത്തിൽ പങ്കെടുക്കും.
